काठमाडौँ । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले राजनीतिक दलहरू जनताको अग्निपरीक्षामा असफल भएको दाबी गरेका छन् । सोमवार जनकपुर विमानस्थलमा सञ्चारकर्मीहरूसँगको कुराकानीमा अध्यक्ष लिङ्देनले राप्रपाबाहेक अरू दल असफल बनेको दाबी गरेका हुन् ।
अध्यक्ष लिङ्देनले मधेसको नेतृत्व गर्ने पार्टीहरूले गएको १५ वर्षमा गणतन्त्र,संघीयता,धर्मनिरपेक्षता लागू भएपछि मात्रै मधेसको नाममा मधेस केन्द्रित राजनीतिक दलहरूबाट ५० जना नेताहरू मन्त्री हुने मौका पाएको तर मधेसका जनताको लागि काम गर्न नसकेको आरोप लगाए ।
उनले मधेसले प्रधानमन्त्री बाहेक सबै मन्त्रालय प्राप्त गरे पनि जनताको पक्षमा केही नभएको उल्लेख गरे । उनले भने, ‘अहिले राष्ट्रिय प्रजातन्त्र पार्टी बाहेक नेपाली जनताको भरोसा अरू कुनै राजनीतिक शक्ति छैन । अन्य सबै राजनीतिक शक्तिहरू जनताको अग्नि परीक्षामा असफल भइसकेका छन् । गलत साबित भइसकेका छन् । ’ उनले जिल्ला तहको नेतृत्वले कार्य योजना बनाएर काम गर्न निर्देशन पनि दिए ।
सम्बन्धित समाचार
थप
ताजा अपडेट
चर्चित
