काठमाडौँ । सिराहको नवराजपुर गाउँपालिका वडा नम्बर–१ बस्ने १७ वर्षीया किशोरी माघ ३० मा मृत फेला परिन् ।
घरमा झुन्डिएको अवस्थामा रिंकुकुमारी सदा मृत भेटिएकी हुन् । उनका आफन्त र परिवारले बलात्कृत भएपछि किशोरीले आत्महत्या गरेको दाबी गरेका छन् । आफन्तहरूले बलात्कारमा संलग्नलाई कारबाही गर्न माग गरेका छन् ।
किशोरीका काकाले फागुन १ मा आत्महत्या दुरुत्साहन कसुरमा अनुसन्धान गर्न जाहेरी दिएका थिए । इलाका प्रहरी कार्यालय लहानमा जाहेरी दर्ता गरेर अनुसन्धान भइरहेको जिल्ला प्रहरी कार्यालय सिरहाका डीएसपी वीरेन्द्र पासवानले रातोपाटीलाई बताए । उनले भने, ‘बलात्कार भएको विषयमा पनि अनुसन्धान हुन्छ, बलात्कार यकिन गर्न चिकित्सकको रिपोर्ट पर्खिरहेका छौँ ।’
प्रहरीले धरान स्थित बिपी कोइराला मेमोरियल अस्पतालमा शव पोस्टमार्टम गर्दा बलात्कारबारे पनि परीक्षण गरिदिन पत्राचार गरेको थियो । डीएसपी पासवान भन्छन्, ‘बलात्कार भएको रिपोर्ट आएमा त्यसबारे पनि अनुसन्धान गर्छौँ ।’
आत्महत्या दुरुत्साहन गरेको कसुरमा चिंकु भन्ने रुपेश मण्डललाई प्रतिवादी बनाएर मृतकका काकाले जाहेरी दिएका छन् । १९ वर्षीय मण्डल फरार छन् ।
