काठमाडौँ । काठमाडौँको सुकेधारामा जापानीज् ट्रेनिङ एण्ड भोकेशनल कलेज (तोकुतेइ गिनोउ इकुसेइ) स्थापना गरिएको छ । यस कलेजको बिहीबार उद्घाटन जाइका नेपाल प्रमुख माचुजाकी मिजुकीले गरेका हुन्। जापान जाने विद्यार्थी र नेपाली कामदारको संख्या बढिरहँदा भाषा र सीपयुक्त जनशक्ति निर्माण गर्ने उद्देश्यले कलेजको स्थापना गरिएको कलेजका सञ्चालक राजेन्द्र केसीले जानकारी दिए। जापान जानेलाई भाषादेखि लिएर त्यहाँ गर्ने काममा समस्या नहोस् भनेर यो कलेज स्थापना गरिएको उनले बताए ।
सरकारसँग अनुमति लिएर र समन्वय गरेरै आफूहरूले कलेज स्थापना गरेको बताउँदै उनले आफूहरूको भाषा र सिप सिकाएर दक्ष जनशक्ति उत्पादन गर्ने रहेको बताए । विभिन्न म्यानपावरबाट जापान जान खोज्ने कामदारहरू यो कलेजमा आएर भाषा र सिप सिक्नेछन्। यहाँबाट भाषा र सिप सिकेका जनशक्ति अन्य म्यानपावर कम्पनीमार्फत जापान जान सक्छन् ।
विगत दुई दशकदेखि पाँच जना अनुभवी सञ्चालकहरू रमेश देवकोटा, राजेन्द्र केसी, महेशकुमार श्रेष्ठ, अरुण पाण्डे र अमिता खड्गी जापानका विभिन्न शिक्षा भाषा र सीपसँग सम्बन्धित संस्थासँग आबद्ध छन् । विगत दुई दशकदेखि शैक्षिक क्षेत्रमा आबद्ध पाँचै जना कलेज सञ्चालकले सुरु गरेको भाषा तथा सिप सिकाउने ट्रेनिङ सेन्टरबाट जापान जान चाहने जनशक्ति लाभान्वित हुने विश्वास गरिएको छ।
